Iníciase o libro cunha aproximación a unha historia dos nosos doces e cunha serie de trucos e advertencias útiles para a elaboración das receitas propostas. As 219 propostas larpeiras están organizadas nos seguintes grupos: cremas, masas e outros complementos; bicas, biscoitos e similares; bolas, budíns, roscas e roscóns; canas, cocadas, chulas, torradas e outras lambetadas; doces de améndoa; doces de froitas; doces do entroido e da matanza; queixos e demais doces de leite; rosquillas e outros doces con baño de xarope. Cada unha das receitas, redactadas de forma moi comprensible, inclúe os ingredientes, a preparación e as súas posibles variantes. O libro inclúe, tamén, setenta e dúas páxinas de fotografías a toda cor, de grande beleza e valor documental, ademais dun glosario e unha completa bibliografía.