Esta Guía de Viños, Augardentes de oruxo e bodegas de Galicia 2004-2005 , preparada por Sumilleres Gallaecia, recolle a máis exhaustiva e rigorosa información publicada ata agora sobre o panorama vitivinícola de Galicia. Concibida como un libro de consulta, dirixido tanto aos profesionais do sector e da hostelería, como ao público afeccionado, proporciona os datos de máis de setecentas marcas comerciais de viños e augardentes, catrocentas bodegas e máis de catrocentas rigorosas notas de cata (realizadas por cincuenta e dous catadores), alén de salientar os trinta e cinco viños distinguidos pola Asociación de Sumilleres Gallaecia. Completan o volume diversos ensaios divulgativos sobre as características dos viños galegos, escritos por primeiras firmas ( Cristino Álvarez, José Luís Hernández Mañas, Custodio L. Zamarra, Mariano García, Carlos Falcó, Ramón Núñez Centella e Luis Moya ); así como un vocabulario especializado sobre os termos relacionados coa cata e co viño, ademais de incluír informes actualizados sobre as características da produción recente de cada unha das Denominacións de Orixe calificadas (Monterrei, Rías Baixas, Ribeira Sacra, Ribeiro e Valdeorras), dos recoñecidos como Viños da Terra (Terra de Betanzos e Terras do Val do Miño-Ourense), así como a do Consello Regulador das Denominacións Xeográficas dos Augardentes e Licores Tradicionais de Galicia. A primeira guía valorativa que recolle toda a riqueza e diversidade dos viños e augardentes galegos, o elixir de ouro que mellor destila a nosa terra.