Pete Payne ten catorce anos. Un día descobre que padece de hipocondría, que é un completo maniático da saúde. Durante todo un ano confiará ó seu diario os fascinantes pormenores médicos que recolle en calquera fonte ó seu alcance. A súa amplísima investigación abarca aspectos tan diversos como o acne, o alcohol, as drogas, o sexo, as dietas, os accidentes e toda clase de enfermidades. Un libro que actualiza nesta fin de milenio ó Diario dun xove maniático (colección Xabarín, Edicións Xerais de Galicia), seguido por milleiros de lectores e lectoras. Esta é unha obra que interesa ós adolescentes que queren saber, pero que son moi vergonzosos para preguntar e ós pais e nais que saben un pouco, pero que son moi vergonzosos para responder. Os autores, Aidan Macfarlane e Ann McPherson son médicos e traballan na comarca de Oxford. Escribiron os libros publicados por Xerais na súa colección Xabarín Diario dun xove maniático e Eu tamén son maniática, acollidos de xeito entusiasta polo público xuvenil galego e que agora son reeditados, actualizados e revisados, dentro da colección Fóra de Xogo, onde xa publicaran Eu e os meus colegas.