Na obra que agora presentamos, Nais, damas, prostitutas e feirantas representan os prototipos femininos básicos que aparecen neste conxunto literario, no que, para a ideoloxía establecida, o primeiro par simboliza o centro positivo e o último as ambiguas ou negativas marxes. Mais por enriba de todas sobresae a sombra poderosa das nais, paraíso perdido que todo o envolve e que se identifica con Galicia. O obxectivo da autora foi pór de manifesto a existencia dunhas estéticas patriarcais e unhas miradas androcéntricas por enriba das cales latexa a multiforme diversidade humana, feminina ou masculina, acochada máis alá dos patróns xenéricos.