Entre o costume e a ruptura é un ciclo de contos no que se nos presenta un fermoso mosaico de mulleres interrelacionadas en situacións e sentimentos. Publicado, orixinalmente, en Canadá e para un público canadense, os relatos transcorren entre a India, Canadá e Gran Bretaña. Dende personaxes ben diversos Rachna Mara é capaz de abrirnos unha ventá ós sentimentos comúns das mulleres asoballadas por distintos factores e momentos. As dúas realidades principais nos relatos, a india e a canadense, presentan dous mundos radicalmente distintos. Dende a India vaise fiando un contexto histórico que se remonta á do canadense. Achégansenos acontecementos tan relevantes como a política de control da natalidade de Indira Gandhi, ou a guerra de Partición entre a India e Paquistán de 1947; alén da historia, reflíctense as relacións humanas, a vida diaria, a visión da existencia. Nos relatos canadenses, Mara presenta unha realidade máis actual e denuncia, igual ca outras autoras de etnias minoritarias, a denominada política do multiculturalismo, o mosaico cultural no que en teoría viven as múltiples etnias que habitan en Canadá. Máis o verdadeiramente importante, por riba da anécdota ou do contexto cultural, reside nesta dor compartida de tódalas mulleres que integran Entre o costume e a ruptura, na busca da propia identidade na que os obstáculos adoptan miles de formas diferentes.