Os coñecementos, os procesos, os productos, os mercados experimentaron mudanzas profundas nas últimas décadas e seguen a cambiar con rapidez. Son cambios que afectan a todos os campos da producción sen excepcións; trátase dun cambio estructural de todo o conxunto do sistema productivo. É un cambio de paradigma cara á economía baseada no coñecemento. A capacidade para crear coñecementos, para asimilalos, para aproveitalos productivamente convértese no eixo de calquera estratexia de desenvolvemento económico. E esa capacidade non depende só da existencia de laboratorios de I+D, senón de todo o entramado que configura un Sistema Nacional de Innovación. O obxectivo central do libro é desentrañar as características do sistema galego de innovación que explican a escasa capacidade de creación de tecnoloxía e determinan as pautas do cambio tecnolóxico experimentado pola nosa industria. Máis que enfatizar as consecuencias sociais das novas tecnoloxías, este estudio céntrase en analizar as causas e consecuencias da insuficiente capacidade innovadora. Trátase de explicar as dificultades de transformación e adaptación ó cambio estructural dos anos setenta en diante e perfilar as bases para unha política tecnolóxica acaída a esa industria neste tempo. En consecuencia, non se trata tando de explicar as raíces históricas do noso atraso industrial, que conta con contribucións senlleiras como as de Beiras (1973) ou a de Carmona (1994) senón, sobre todo, as dificultades de adaptación á crise do paradigma industrial e tecnolóxico da posguerra e a un proceso de intensificación da competencia, nos mercados globais e locais, nun contexto de crecemento lento da economía. Un dos obxectivos é, polo tanto, mostrar a importancia da capacidade tecnolóxica propia para reducir a dependencia e aumentar sequera levemente o autocontrol sobre a nosa propia evolución sen ser inmisericordemente abanedados por cada vento de cambio, que sempre nos chega de fóra, colléndonos por sorpresa e sen capacidade para reaccionar. Para aumentar o control sobre as forzas do cambio resulta imprescindible ter capacidade para innovar, xerar cambios, asimilar rápido e reinventar os cambios foráneos evitando quedar fóra de xogo.