Producto da colaboración entre a Universidade de Vigo e a Acción Jean Monnet, promovida pola Comisión Europea, nace España e Europa. Do franquismo ao euro. Neste libro participan unha serie de profesores da Universidade de Vigo dende distintas especialidades: historia, ciencia política e da administración, socioloxía e economía. Así Luís Domínguez Castro aborda os aspectos históricos analizando, entre outros aspectos, a idea de Europa no pensamento español do século XX, as relacións coas Comunidades durante o franquismo e na etapa democrática. Celso Caneda Outeda estudia o sistema polçitico-institucional e xurídico da Unión Europea. Argimiro Rojo Salgado estudia as Comunidades Autónomas e a Unión Europea. Alberto Saco Álvarez analiza a converxencia demográfica entre España e Eáuropa. Manuel González Fernández expón as transformacións e imaxinarios dos espacios e sociedades rurais. Xulio Pardellas de Blas analiza os aspectos económicos, realizando unha análise comparada da economía española e europea e estudiando, entre outros, aspectos de economía aplicada referida a sectores como a agricultura, pesca e o futuro do turismo. Por último, Mónica López Viso aborda as políticas comunitarias referidas ao emprego, Enrique José Varela Álvarez as políticas públicas e medioambientais e Xan Bouzada Fernández as políticas culturais. Deste xeito ofrécesella aos alumnos e alumnas, e ao público galego en xeral, unha ferramenta útil para informárense sobre o futuro de Europa e para dalgún modo, participar nun debate sobre as institucións comunitarias co que se pretende fortalecer valores fundamentais como a democracia, a solidariedade ou a tolerancia que forman parte do legado histórico de todos os europeos. Así mesmo é tamén unha ferramenta para buscar colectivamente fórmulas que nos permitan conservar os sinais básicos da nosa identidade cultural e ser partícipes dun novo desenvolvemento comunitario máis solidario.