Con Rotas de bicicleta de montaña, Xerais abre unha nova vía no panorama editorial ó publicar por primeira vez en Galicia un libro destinado ós afeccionados ó mundo da bicicleta. Rotas de bicicleta de montaña é ante todo un libro práctico, unha guía que nos descobre os itinerarios de bicicleta de montaña máis apetecibles e interesantes de Galicia, cunha abundante profusión de mapas, esquemas, perfís, planos e fotografías, e que nos vai indicando o camiño a seguir cun sistema de gráficos de rápida visualización, novidoso e único no mundo da edición en España. Este libro pretende ser un amigo do afeccionado á bicicleta, un compañeiro de rota amable e rigoroso, pois está escrito cuns criterios fondamente profesionais. Rotas de bicicleta de montaña foi elaborado por Xosé Manuel Castaño, licenciado en Xeografía e Historia, que exerce o seu traballo profesional como conservador do Museo de Pontevera e que nos vai descrubrindo, a través das rotas que propón, pequenas cousas sobre a cultura, a historia ou a natureza dos lugares que percorre. Trátase dun libro feito por un excelente e rigoroso coñecedor do mundo da bicicleta, con ampla experiencia nese campo, que nos ensina a integrarnos na natureza respectándoa e queréndoa. Rotas de bicicletas de montaña preséntanos un total de 23 percorridos por toda Galicia que nos conducen polos cumes do Courel e polo río Soldón, polo Lor e pola fermosa fervenza do Toxa, polo Monte Pindo e polos dólmenes de Mau de Salas, pola Serra do Barbanza e polo mosteiro de Sobrado, polos Ancares, polo monte Xesteiras, por Manzaneda, pola parte alta da península do Morrazo, polas rotas dos mosteiros, pola Ribeira Sacra, pola rota dos petroglifos, polo monte Aloia...