A guerra civil tamén marcou con ferro a vida e os proxectos dos escritores galegos: o ferro da morte, o ferro do medo, o ferro do silencio. En Os escritores galegos ante a Guerra Civil española, Xesús Alonso Montero rescata textos pouco coñecidos, ademais dalgúns inéditos, que revelan o complexo e problemático mapa moral e político daqueles anos. Textos non frecuentados para achegármonos á personalidade política e ao labor literario de escritores como Otero Pedrayo, Vicente Risco, Álvaro Cunqueiro, Ramón Cabanillas, Iglesia Alvariño, Celso Emilio Ferreiro, Álvaro de las Casas...