Egun batean erabakitzen dugu beste bizitza bat sortu eta etxera ekarri behar dugula; hara orain seme edo alaba bat etxean, erabaki mamitu baten ondorio: opari zoragarria. Aurrerabiderik txikienaren notario bihurtzen gara, aldaketarik txikienarena. Horrek baieztatzen digu bere bidean aurrera doala. Ongi ari dela hazten, zoriontsu eta pozik. Horregatik da garrantzitsua liburu hau. Haurraren lehen urtean barrena gure ondoan edukiko dugulako, haren historia pertsonalaren oharrak bertan hartuz, denbora pasatuta ere, berak gogoraraziko digulako nolakoa izan zen haren bizitza-abenturaren aurreneko urratsa eta nola bizi izan genuen guk hori bera haren ondoan. Memoriari gure haurraren berri gordetzen laguntzen diogularik, gu nolakoak ginen ari gara ikusten. Handitzen denerako begi batzuk emango dizkiogu gure txikiari, begirada bat, bere iraganaren irudi finkoa, bere burua ezagutu dezan, eta jakin dezan, bide batez, zein amultsuki zaindu genuen, zein maitatua eta desiratua izan zen. Eta berak gu ikusiko gaitu. Orduko eta oraingo antzekotasunak eta ezberdintasunak aztertuko ditu. Konturatuko da zein harro geunden berataz, eta horrela agian ezinbesteko gure hutsegiteak barkatuko dizkigu.