Estas rapazas chegarán moi alto, que, cun formidable despregue de recursos imaxinativos, parte dunha situación sorprendente: o botafumeiro da catedral de Santiago sóltase e bota a voar polo ceo adiante, levando enriba del a Clara e as xemelgas Dorotea e Teodora, as tres nenas protagonistas. A partir de aquí, as situacións insólitas, os diálogos delirantes, o humor corrosivo, a posta en cuestión das convencións sociais, a lóxica do absurdo... presiden o desenvolvemento deste magnífico e divertidísimo relato. As ilustracións de Teresa Novoa contribúen a salientar o carácter humorístico e corrosivo deste libro que, sen dúbida, fará as delicias dos lectores de nove anos en diante.