Este libro, de características pouco menos que insólitas na literatura galega, recolle os apuntamentos que Antonio Tovar foi escribindo entre xuño de 1995 e novembro de 1997 en torno ós temas que marcan obsesivamente a súa obra poética: Deus, o sexo, a literatura, o propio eu, sempre en procura desa especie de transcendencia atea que impregna toda a obra tovariana. O libro inclúe, a xeito de limiar, unhas notas da man de Xesús Alonso Montero.