No mundo hai moitas granxas, pero ningunha é como Mulebap. Mulebap é grande, tan grande que nela hai lugar para todos. Mulebap é pequena, tan pequena que mesmo ata nos corazóns máis pequenos atopa lugar. Mulebap non lle pertence a ninguén, igual que o sol e o aire non lle pertencen a ninguén. Mulebap pertence a cadaquén, igual que o mundo nos pertence a todos. Mulebap é a granxa onde transcorren as historias de tres amigos inseparables que van xuntos a todas partes: Paquiño o galo, Xan o rato, e Bartolo o porquiño gordecho. Tres amigos recolle dúas das máis coñecidas historias escritas e debuxadas polo alemán Helme Heine, as tituladas Tres amigos e O espertador. Dúas pequenas historias que fan un grande libro sobre a amizade, sobre a posibilidade de convivir, de comprender ó outro sendo diferente, sobre ese sentimento que a todos nos fai máis humanos.