Istas cosas siempre prenzipian igual... A que no yes capaz d’elaborar un metodo d’autoaprendizache d’a luenga aragonesa?, sin parar cuenta que, a sobén, parellana pro­posa-trampa se torna en tot un reto y cuasi una custión d’onor ta un aragonés... Que no? Pos agora te vas a enterar tu... Siga como siga, aquí lo tiens entre as tuyas mans, pre­bando d’averiguar qué ye ixo de “Arredol” y si li fa chus­tizia a o subtítol que diz “una gambadeta por a luenga aragonesa”. Nusatros te lo contamos. “Arredol” quiere estar un me­todo ta aprender a fablar y amar a nuestra luenga, ixu­plidada en bel caso, y en atros, prou a ormino, refusada u maltratada, cuan no as dos cosas de vez. Una aina que t’abrá de valer ta fer un curso de traza tradizional, ye dezir, indo ta clase y fichando como un campión, si ye que asinas lo prefieres; pero, y más que más, ye un me­todo que te permitirá iniziar-te y fer-te una ideya prou aprosimada d’o que ye l’aragonés, por a tuya cuenta (y risque) y a o tuyo ritmo, a la tuya bola, que dizen os nuestros vezins castellans, porque contas con un amplo vocabulario y modelos de verbos. Pero talmén y talmén o que te podrá resultar más atrautivo, ye que te i tro­barás con un apéndiz con toz os eixerzizios resueltos... Un traste útil si ye que plegas a perder-te u a embolicar-te. A la finitiva, un metodo fresco y, talmén, no pas a l’uso. Estructurau de traza platera y an que podrás tro­bar leuturas dialogadas, eixerzizios arrienda y chuegos, muitos chuegos. Un tarabidau ludico-lingüistico que te menará por os camins de l’aragonés sin garra (u poquet) esfuerzo, d’una manera fázil y siempre prebando de no aburrir-te, que ya se sabe, que os idiomas los carga o diaple y que os follez d’as parolas son bien trafucadors. Si lo emos conseguiu, perfeuto. Pero ixo lo abrá de dezir o tiempo y, más que más, vusatros, que lo abrez de patir si ye que tos da la lunada d’empezipiar-lo, rematar-lo y no tos tornaz varrenaus. Ta rematar, a tu, aragonés, que has enzertau en agafar ista ferramienta, nomás nos manca que preguntar-te... A que no yes capaz d’aprender aragonés...?