Velaquí a historia agraria do Ribeiro nos dous últimos séculos. Unha das terras máis ricas, emblemáticas, e de máis tradición e sona de Galicia. Abonda con mencionar o nome desta comarca para que encoen nos nosos sentidos sensacións calorosas, relembros saudosos, ledicias vividas e pousos históricos, di no limiar o catedrático Ramón Villares. O autor aborda o coñecemento desta bisbarra a través de dúas liñas de investigación: o estudio da propiedade da terra e o estudio das familias (as economías familiares) arredor da súa principal fonte de riqueza e comercio: o viño. A desamortización de Mendizábal, os movementos agrarios, a redención do foro, as clases sociais, os tipos humanos, os traballos da vendima, as cerimonias e celebracións, os mercados, o transporte, a alimentación, a cultura doméstica e popular, etc., aparecen nestas páxinas coa sistematización obrigada do investigador, pero tamén co talento de quen sabe mergullarnos nun mundo de sorprendente riqueza e seducción.