A xente importante, os xefes de Estado ou as figuras transcendentes do escenario internacional non terían chegado a onde están de ter cometido a estupidez de dicirlles a verdade os periodistas. O espírito desta frase do periodista e escritor norteamericano P.J.O. Rourke é o que inspira o o cento de artigos de Xosé Manuel Pereiro que se recollen neste libro, publicados no xornal La Opinión de A Coruña. Son unha mirada ácida e descrida, pero á vez non exenta de tenrura do acontecer diario, dende os cambios dos nosos costumes e forma de vida ata a complexidade da situación política nacional e internacional. Textos narrativos vibrantes, directos, intelixentes, e sobre todo divertidos. Unhas auténticas radiografías do noso tempo que desvelan o que subxace ás noticias do día a día e analizan a súa repercusión na nosa sociedade. Si home si é un exercicio dun xornalismo rabudo, que desmonta as falacias de calquera poder ou do comunmente establecido e provoca a reflexión... e o sorriso. Porque como di o propio autor, unha crítica non ten por que ser un laio ou sermón. Xosé Manuel Pereiro (Monforte de Lemos, 1956), é na actualidade redactor de TVE na Coruña, correspondente de El País, director da revista cultural Bravú e coeditor do portal Bravú.net. Foi un dos fundadores da publicación La Naval (1986-87), e letrista e cantante do grupo de rock Radio Océano. Dende 1988 foi director e guionista de diversos programas de televisión: Canal 13 (1988), Composteláns (1989) e ¡Que Serán? (1999). Dende 1981 vén escribindo en diferentes xornais galegos, desde Faro de Vigo a La Voz de Galicia. En outubro de 2000 iniciou o seu labor como columnista en La Opinión de A Coruña. Si home si é o seu primeiro libro.