A pontevedres Dosinda Areses é, sen dúbida, unha das figuras máis enigmáticas da Xeración intelectual do 36. Iniciada no activismo político-cultural galeguista no Santiago da IIª República a través da FUEG e das Mocedades Galeguistas, tívose que exiliar en México a comezos dos anos cincuenta, logo de colaborar coa guerrilla galega antifranquista. Na capital mexicana participou na fundación da célula da UPG. No volume que edita Xerais na súa colección "Crónica" aparece recompilada a súa obra publicística, dada a coñecer nas páxinas de tres periódicos de Vigo (El Pueblo Gallego, Hoja del Lunes e A Nosa Terra) entre 1979 e 1983. Estas prosas constitúen, atendendo a súa dimensión puramente estilística, un dos fitos do xornalismo galego dos anos da Reforma política. En palabras de Antón Capelán, que realizou o prólogo da obra e a recompilación dos 39 artigos, "os textos que asina a escritora de Lérez acadan unha sorprendente calidade artística, apoiada nunha lingua ductilísima e chea de matices, e nunha notable riqueza cultural, co que se manteñen a cen leguas tanto da confesión persoal intrascendente como do novo costumismo galego para consumo da corte madrileña, a miúdo pouco crítico". O volume inclúe un apéndice e un completo índice onomástico.