Os Glups son uns pequenos e pacíficos seres de cores que habitan nas lagoas e pozas. Unha das pozas máis grande é a de Estrelamar, onde vive Glupi. Glups!!, o fermoso e espectacular álbum realizado por Uqui Permuy, empregando técnicas infográficas, recolle unha das aventuras de Glupi. Lendo o xornal A Poza unha noticia deixouno teso: "Grandes tremores de area e de auga percorren as veciñas pozas". Que motivará tan estrano suceso? Glups!! é a aventura das cores, das formas acuáticas en movemento, do cariño e da amizade entre seres diversos. Un álbum insólito na literatura infantil galega.